محمد هنيدي: محمد صلاح ماتولدش في بقه معلقه دهب.. وقدر يحقق اللي كنا شايفينه مستحيل
عبر الفنان المصري محمد هنيدي عن دعمه لمحمد صلاح قائد المنتخب الوطني وفريق ليفربول الإنجليزي، بعد خسارته لقب دوري أبطال أوروبا على يد ريال مدريد.
محمد هنيدي كتب، على حسابه الخاص على موقع "الفيس بوك": "عارف لما بتبقى بتلعب بلاعب في البلاي ستشين وفجأة تلاقيك بتنافسه او اللاعب بعد ما اعتزل بيحلل اداءك في التلفزيون وبيوصفك بالافضل في منطقتك في العالم".
وأضاف: "عشان كدة بقى عايز أقول حاجة ... بقالي فترة بشوف "بعض" الشباب اللي بيحاول يسخر او يقلل من صلاح ... يمكن يكونوا مابيحبوش صلاح او بيشجعوا فرق منافسه ...من حقك ماتحبش صلاح وحقك تحب فريق منافس وتشجعه .. بس الفكرة ليه تقلل او تكره واحد قدر يعمل اللي ملايين كانوا بيشوفوه مستحيل؟".
وتابع: "صلاح اللي كان بيسافر بالقطار كل يوم وينام في النادي ع الأرض وبدون واسطة قدر يصنع نفسه من الصفر ... لغاية لما وصل انه بقى ينافس على الأفضل في العالم ... صلاح زينا وشبهنا .. ماتولدش في بقه معلقه دهب .. قدر يكون مثال لأي واحد بيتعب وشايف انه حلمه وهدفه مستحيل يتحقق ... صلاح مثال لأي شخص مجتهد وبيمر بظروف صعبة وحياة صعبة ... مثال انك تقدر مش بس تكون الأفضل في بلدك ... تكون الأفضل في العالم".
واختتم كلامه، بقوله: "الفكرة مش في الشخص .. الفكرة في الفكرة نفسها ... ان يكون عندنا شخص واشخاص طبعا في مجالات كتير تانيه زيه... قدروا يحققوا اللي انت واحنا كنا شايفينه مستحيل .. فالحب والتقدير لصلاح.. مش حب لشخص ..حب لفكرة ونجاح.. وهاردلك لصلاح".