شاهد.. آسر ياسين ينعي مساعده بكلمات مبكية

نعى الفنان المصري آسر ياسين مساعده، الذي يدعى "مجدي"، والذي كان يعمل معه لمدة 14 عاما.

آسر ياسين نشر صورة تجمعه بمساعده الراحل، على حسابه الخاص على موقع "انستجرام"، وعلق قائلا: "اهداء لمجدي! كان المساعد بتاعي لأكتر من ١٤ سنة، قصته فيها كمية عِبر حياتية غير طبيعية.. اشتغل كهربائي لمدة تلاتين سنة وبعد كده حصلتله حادثة موت اتكتبله فيها عمر جديد..ومن هنا ابتدا يشتغل مساعد ليا بناءًا علي نصيحة أبويا اللي رشحهولي عشان اخلاصه وأمانته".

وأضاف: "عمره ما كان يتخيل انه يشتغل في السيما ويقابل روبي ومني زكي ومحمود حميدة!! ومش بس كده، ده كمان وقف قدام الكاميرا كذا مرة في أدوار شرفية.. كل الناس حبته لأنه يخش القلب علي طول لطيبته وبساطته.. كان يخاف عليا جداً بالذات في مشاهد الاكشن.. وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام زي الصورة اللي في البوست".

وتابع: "اللذيذ في الموضوع انه كان ييجي يسألني عن نصيحتي في حاجات شخصية علي الرغم من فرق السن.. مفيش طفل يشوفه غير ولازم يبتسم لا إرادياً بسبب وشه البشوش والطفولي".

واختتم كلامه، بقوله: "مجدي رحل عن عالمنا من ٣ أسابيع ، ولحد النهاردة أنا ما اتكلمتش عنه. يمكن لأني بتجنب ده أو أني بعتبره ماحصلش، مش عارف.. بس اللي عارفه كويس أوي أنه حقيقي واحشني.. سلام يا ميجو ♥الفاتحة".