راندا البحيري تكشف سبب تغيبها عن مهرجان القاهرة السينمائي
كشفت الفنانة المصرية راندا البحيري سبب تغيبها عن حضور فعاليات مهرجان القاهرة السينمائي الدولي.
راندا البحيري كتبت، على حسابها الخاص على موقع "الفيس بوك": "بحب بلدي و هفضل أحبها .. بلدي ماشيه في دمي و جوا قلبي .. من سنوات و الي الآن مثلت بطولات و أفلام كتير جداً .. زمان بقي كنت اقرا دايماً مانشيت في مُعظم الجرايد و المجلات مكتوب ((غياب نجوم السينما عن مهرجان السينما)) و كنت بسمع ب وداني إشادة بيا و ب كام زميل يتعدوا علي صوابع الإيد الواحده .. اللي كنا بنروح سنوياً ندعم مهرجان بلدنا … من ((قلبنا)) و الدليل انه من قلبنا ان مكانش فيه سوشيال و لا ترند و لا حاجه بتحصل اما بنحضر ولا مثلا بناخد فلوس ولا بناخد شهره احنا بس بنروح علشان نقف جنب مهرجان بلدنا اللي كان دايماً بيتعمل في الاوبرا المصريه".
وأضافت: "وعلي الناحيه التانيه كان فيه ممثلين مبيروحوش مهرجان بلدهم ده و بيهتموا جداً بمهرجانات منافسه في بلاد معندهاش سينما بس علشان هياخدوا فلوس كتير لما يروحوا و كانوا بيروحوا جري و كنت برفض علشان بلدي المهم .. ٢٠٠٤ .. ٢٠٠٥ ..٢٠٠٦ و هكذا و كتير اوي من السنين كنت منتظمه في الحضور و الندوات وغيره لحد ما القائمين علي المهرجان إتغيروا و هوب من ساعتها إتقطعت الأخبار و العنوان الحالي اللي هو نفسه العنوان القديم اللي كان بييجي عليه الدعوات لسه موجود و مبيجيبش عليه اي دعوات .. زي ما يكون حد جه تدخل و مسح اسمي من المدعويين".
وأكملت: "عموماً هو ريحني من وجع قلب الماكياج و الشعر و اختيار فستان مناسب ولائق للحدث.. و بجد بجد انا عند نفسي كبيره اوي اوي و اي مكان مش عايزني هو اللي خسران والله هو اللي خسران مش انا … و ده حصل من سنين كتير اوي وانا عمري ما بروح مكان مش معزومه عليه و لا بروح مكان من غير دعوه علشان كده عمري ما هروح".
وتابعت: "و البوست ده مش علشان هم يعرفوا ان مبيجيليش دعوه لا البوست ده ردا علي كل الناس اللي بتقول انت ليه مبتشتغليش او ليه مش موجوده علشان الدنيا كده .. انت لو مصاحب الكل و لذيذ و عسل هتبقي موجود و لو مش مصاحب الكل حقك هيتاخد.. انا كفايه عليّ اني عامله اكتر من ٥٠٠ عمل فني و ممكن اكتر بين اقل من ١٠٠ فيلم سينمائي و و اكتر منهم مسلسلات اذاعية و تليفزيونيه و مسرح و مشاريع تخرج و دوبلاچ .. مثلت كتير جدا. و مثلت ادوار كتير بجد التاريخ هيفتكرها .. مثلت مصر و جبت ل بلدي جوايز.. خدت دبلومه شرفيه في التمثيل و خدت القاب برا البلد كتير جدا لكوني ممثله مصريه متميزه ".
واستطردت: "المهرجان ده اللي مبيبعتليش ((هو نفسه)) كان مدخل افلامي علي هامش المهرجان بتتعرض فيه و كنت مرشحه لاكثر من جائزه .. و مهرجان الإسكندريه اللي بيتعمل كل سنه من غيري برضه واخده منهم جائزه احسن ممثله مرتين و مره من جمعية نقاد الفيلم.. يعني مهرجانات شايفاك احسن ممثل ب اعترافهم وجائزتهم بيحاولوا يموتوك بالحيا و شايفين انك خلاص مبقتش موجود او مش متعرفين بوجودك .. انا كمان مش معترفه بوجودكم .. و بجد والله من غير ذكر اسماء كان فيه مهرجانات برا بلدي بتتعمل و كنت بغير علي مهرجان بلدي و كنت بستني من السنه السنه علشان نحتفل بالسينما و بالشغل.. حسبي الله و نعم الوكيل".