برلنتي عامر تكشف تفاصيل اعتداء طليقها سعد الصغير عليها

كشفت الفنانة برلنتي عامر، تفاصيل تعرضها للاعتداء من طليقها الفنان سعد الصغير، وأبرز الخلافات التي كانت بينهما أثناء زواجهما.

برلنتي عامر قالت “أنا كنت قاعدة مع سعد الصغير في الفيلا، وفجأة حدث خلاف وتعدى عليا بالضرب، وشدني من شعري".

وأضافت: “كلمت أمي وأختي وأول ما جم شتم وقال ألفاظ وركبت مع والدتي العربية ، وفجأة سعد الصغير جه ورانا بسرعة بعربيته وخبط فينا ومسك الطوب وحدفه على أزاز العربية بتاعتنا وأختي دماغها اتفتحت لما كسر أزاز العربية”

وتابعت: “أنا بقالي مع سعد الصغير 4 سنوات وكنت ساعات ببقى معاه في شغله"، وأشارت إلى أنها قدمت أعمال فنية مثل مسلسل ”رأس الغول" مع محمود عبد العزيز ومسلسل "هربانة منها ".

وأكدت: “المصايب اللي انا فيها كلها بسبب سعد الصغير، حتى لما كنت بدخل شغل يكلم الناس من ورايا عشان أمشي من الشغل، روحت صورت في مسلسل وبعد التصوير تم حذف المشاهد الخاصة بي وعرفت إن هو السبب ومكانش عايزني أظهر عشان كان بيحبني حب تملك".

وتابعت: “ما أثير أنى راقصة عار تمامًا من الصحة والموضوع ده مزعلني جدًا ولو حد عنده ليه حاجة وأنا برقص يطلعها، واللى اتقال عليا كان بسبب أنه كان متجوز راقصة قبلي".

وأكملت: “سعد الصغير أكبر مني بـ 22 سنة وحبيته كأب قبل ما يكون زوج وأنا مختش سعد الصغير من على مراته لأنه كان له تجارب زواج متعددة، وهو عمل حاجات مش طبيعية عشان يتجوزني وكان بيقعد تحت الشباك بالـ 7 ساعات عشان يشوفني، عمل المستحيل عشان اتجوزه، ولكن بعد الزواج كان بيبعتلي فيديوهات وبيقولي لو انتى اتأذيتي يبقى أنا اللي أذيتك".

وأضافت: “أصحابي وأصدقائي ظالميني لما بيحسدوني على زواجي من سعد الصغير، هو حبني بس مفيش حد بيحب حد بيعمل كده، وبعد الاعتداء عليّ أنا وأختي ووالدتي، بعت اعتذارات كتير لكن مش هسامحه عشان كان هيموت أختي، ولما خرجت من المستشفى قال هترجعيلى تانى وأنا استحالة أرجع عشان المرة اللى جاية هيقتلنى".