عمرو أديب يسخر من الهجوم على منى زكي: مستغرب إننا واصلين لمرحلة الحواجب

سخر الإعلامي عمرو أديب، الهجوم على النجمة منى زكي، بعد صدور البوستر الدعائي لمسلسلها الجديد "تحت الوصاية"، والذي من المقرر عرضه في شهر رمضان القادم.

عمرو أديب قال أن منى زكي تعرضت لهجوم غير طبيعي، دون معرفة الجمهور للقصة أو الدور الذي ستلعبه، ساخرا من انتقاد البعض لحاجبيها على البوستر، حيث قال: "لو اتعملت الحواجب، هيقولوا إيه ده إيه الفتنة دي هو في ست محجبة شكلها وشفايفها كده".

وأضاف: "مستغرب جدا إننا واصلين لمرحلة الحواجب، إيه شغل كيد النسا اللي إحنا فيه ده، خفوا شوية على الست واستنوا لما تشوفوا المسلسل.. ، أومال لو طلعت محجبة وفي خصلة نازلة، كنتوا هتعملوا فيها إيه!".

وتابع: "منى زكي ست محترمة ومتجوزة راجل محترم، عمرنا ما سمعنا عنهم حاجة وحشة، مفيش شيء سيئ يخلي التربص بمنى زكي كده، طبعا الحجاب فرض وأنا مقتنع بكده، وأحترم أي فتاة وسيدة محجبة، لكن هو مفيش واحدة محجبة شريرة؟".

وأكمل: "زي كل شغلانة في حد كويس وحد وحش، حاسس إني مضطر أشرح إن في ناس بتعمل سيئات وناس تعمل حسنات، الست لسة لا عملت سيئات أو حسنات، يعني قضايا العيش والفراخ والأسعار والوظائف والبلد والدنيا كل ده حلتوه، ومفيش غير مسلسل منى زكي!.. في ناس مستكترة على منى زكي تطلع تعمل دور بالحجاب".