عارفة عبد الرسول تكشف سبب نجاح مسلسل "بالطو" وسر اختيار مريم الجندي للبطولة
كشفت الفنانة المصرية عارفة بعد الرسول عن سبب نجاح مسلسل "بالطو"، والذي عُرض مؤخرا عبر منصة Watch it.
عارفة عبد الرسول كتبت، على حسابها بموقع "الفيس بوك": "كلمتين محشورين في زوري حاقولهم ورزقي على الله.. ليه مسلسل بالطو نجح النجاح المدوى ده.. لأنه شبهنا بتاعنا".
وأضافت: "مافيش حد ماشافش حتة منه أو حد شبهه في طرشوخ الليف تقول لنفسك فجأة.. آه والله كان بيحصل كده.. إحنا كممثلين ماكناش إحنا.. بس كنا إحنا".
وعن سبب اختيار الفنانة مريم الجندي للمشاركة في مسلسل "بالطو"، قالت: "في كلمة قالهالي المخرج عمر المهندس على جنب كده.. لما كان بيعمل الكاستينج للمسلسل دا عشان يلاقي بنت شبهنا من طبقة متوسطة ومن مدينة في الريف تبقى دكتورة في وحدة صحية في أرياف برضه.. كل البنات لاعبة في شكلها وتاتو وشفايف وحواجب.. كلهم دكتور تجميل واحد عامل قالب واحد".
وتابعت: "وقع الاختيار على مريم الجندى...مش عشان هي بنت محمود الجندي ولا أخت أحمد الجندى...ولا عشان هي ممثلة كويسة.. رغم إنها ممثلة ممتازة.. ولاعشان كانت في ورشة أستاذنا خالد جلال ولفت لفة حلوو على المسرح.. اتكحرتت يعنى.. كل ده مكانش سبب لترشيحها للدور.. السبب كان شكلها العادي.. بنتنا.. مننا".
ووجهت نصيحة للفتيات قائلة: "صرخة مكتومة من قلبي للبنات.. أرجوكم.. حبي شكلك اللى ربنا وهبه لك.. مناخيرك كبيرة شوية وماله دي ميزة.. سنانك معوجة مايضرش دى ميزة.. أرجوكم.. كونوا عاديين".