حورية فرغلي: كان عندي 9 أورام سرطانية في الرحم واتفاجأت أن الدكتور شاله بعد ما فوقت

كشفت الفنانة المصرية حورية فرغلي تفاصيل العملية الجراحية التي خضعت لها مؤخرا لاستئصال الرحم.

حورية فرغلي قالت: "الموضوع حصل بالصدفة، أنا من 15 سنة شيلت 7 أورام من الرحم، والدكتور إداني فرصة 10 سنين أتجوز وأحاول أخلف، ويشيل الرحم أثناء الولادة، لإن عندي كمية أورام كتيرة، لكن الشغل والفن أخذني ولم أرتبط".

وأضافت: "كنت راجعة من أبوظبي وفي زيارة لحد في المستشفى، لقيت البنطلون كله نزيف، والدكتور كشف عليا وقال بكرا الصبح لازم عمليات".

وتابعت: "والدي جراح وقاللي الموضوع سهل عندك شوية أورام وعملية بسيطة بالمنظار وهتبقي زي الفل، لقيت عندي 9 أورام داخل الرحم 6 سم في 7 سم وسرطانية، وكان لازم يشيل الرحم بالكامل حتى عنق الرحم".

وكشفت أنها فوجئت باستئصال الرحم، بقولها: "عرفت إن الدكتور شال الرحم بعد ما فوقت من التخدير، والحمد الله كان نفسي أخلف لكن خلاص ربنا مش رايد".

وطمأنت جمهورها على حالتها الصحية بعد العملية قائلة: "أنا طلعت من المستشفى أول إمبارح، والحمد لله ماشية على رجلي وأحسن كتير، وهرجع شغلي لإن النزيف كان بيجيلي كل شهر ويستنزفني".

وأعربت عن حزنها لعدم تلقيها زيارات أثناء تواجدها بالمستشفى، قائلة: "أنا وماما كنا في المستشفى، مفيش حد فكر يزورنا، ووكيل أعمالي أكيد هو اللي صورني علشان الناس تعرف الخبر، وكنت منتظرة أي حد أعرفه بيحبني يزورني، لكن مش هشحت الحب والحنية".