مصطفى كامل يرد على انتقادات إلغاء حفل ترافيس سكوت في مصر

كشف نقيب المهن الموسيقية الفنان مصطفى كامل كواليس جديدة حول أزمة تصريح حفل نجم الراب العالمي ترافيس سكوت في الأهرامات.

مصطفى كامل قل في فيديو عبر صفحته على "فيسبوك": "البيان اللي صدر من نقابة المهن الموسيقية كان موضح كل شيء".

وأضاف: " ومن ساعة ما توليت الأمر في النقابة واحنا واخدين قرار بإننا ضد المنع من العازف الصغير حتى النجم السوبر ستار، أحنا حاطين ضوابط ومعايير لإدارة الشأن ده، أقريناهم على مطربين بلدنا، وكل الناس شغالة ومرفضتش حفل خالص لأى حد".

وتابع: "جالي تليفون قالولي إن فيه شركة من الشركات المعتادة على التراخيص من داخل النقابة، ولجنة العمل واللوائح القانونية قالولي مفيش مشكلة ورخصنا، والترخيص طلع بالفعل، مكنتش أعرف ساعتها ترافيس سكوت ولا طقوسه ولا أي حاجة، وفيه ناس كتير متعرفوش وإعلاميين كمان، ولكن لجنة العمل قالولي يلا فأنا رخصت".

وأكمل: "حسينا بمخاوف الناس خاصة وأن أبنائنا سواء كانوا عرب أو أجانب سيذهبون للحفل ونقابة المهن الموسيقية المنوط بيها الترخيص في حالة وجود أي حفل أجنبي، أنا ووزارة الثقافة والقوى العاملة المصرية، إحنا 3 جهات بنصدر الترخيص في حالة الحفلات دي".

وأضاف: "أنا ممنعتش ومرفضتش لترافيس أو لغيره أساسا، ولكن كان لازم نستقرأ الوضع اللي حصل وبإجماع، عارف إن الشركة هتأمن حفلها زيها زي أي شركة ولكن لا بد من الالتزام بالموافقات الأمنية، أنا كجهة مختصة باستخرج تصاريح فقط معنديش أدوات حماية وأمن للحفل من أي شغب ولا أملك أدوات تنظيم، أنا جهة مانحة ترخيص فني فقط".

واختتم كلامه، قائلًا: "أنا معايا مجلس إدارة محترم، البيان اللي صدر عن كل زميل واللي كانت المخاوف اللي جوايا جوا كل واحد فينا بردو، ولو لا قدر الله حصل حاجة هيتقالنا ياللي موتوا الناس، احنا كل اللي طلبناه وضع الاعتبارات الأمنية من حيث التنفيذ، فلو الترخيص موجود مع الشركة والموافقات الأمنية جات وكلنا كنقابة هنضرب تعظيم سلام من الجهة المنوط بها حماية هذا الحفل".