لقاء سويدان تعلق على الهجوم عليها بعد أزمتها مع ميدو عادل: هقول اللي حصل قدام جهات التحقيق
تحدثت الفنانة المصرية لقاء سويدان عن الهجوم الذي تتعرض له في البرامج بعد أزمتها الأخيرة مع الفنان ميدو عادل، وقالت إن سبب هذا الهجوم هو رفضها الظهور في هذه البرامج.
لقاء سويدان قالت: "أنا مش عايزة أرد رغم أني بتهاجم في البرامج لأنهم بيتصلوا بيا وبيقولوا إعملي مداخلة في التليفون وتعالي عشان تردي، هل أنا المفروض أروح برنامج أنا عارفة أن هيبقى في هجوم وهتبقي لو في مشكلة هتكبر ونقعد نتبادل بقى، لو في خلاف بيني وبين زميل مش هطلع اشتم فيه في برنامج دي مش أخلاقي ، أنا برفض أطلع في برنامج عارفة إنه هيجرني لخلاف أكبر من اللي موجود ف اتشتم معنديش مشكلة ياما في نجوم أكبر مني واتشتموا".
وأضافت: "مش هقول بالظبط إيه اللي حصل أنا هقوله قدام جهات التحقيق الموضوع من 26 أغسطس وأنا مقدمة مذكرة مش عشان حاجات حصلت في حقي أنا بس لكن عشان تجاوزات كتير حصلت، أنا ست متربية في المسرح من وأنا صغيرة واشتغلت مع سعاد حسني وأحمد زكي وأنا عندي 9 سنين سنة 1983 ولكل الناس أنا عندي 49 سنة ومش متضايقة من سني وأه أنا كبيرة الحمد لله بصحتي ومبسوطة أن ربنا مديني صحة وشكل مناسب ليا في السن دا".
واختتمت كلامها، بقولها: "الناس اللي بتدخل تشتم اللجان الإلكترونية أسهل حاجة إني أرد لكن دي مش أخلاقي اللي بيفرق معايا الناس الحقيقة أصحابي اللي بيحبوني وواقفين جنبي".