مؤلف مسلسل "سفاح الجيزة" يهاجم المخرج: في خط درامي كامل تم إضافته علشان مرات المنتج تمثل

هاجم المؤلف محمد صلاح عزب، المخرج هادي الباجوري، مخرج مسلسل "سفاح الجيزة" بسبب إعتراضه على نهاية العمل.

وقال عزب: "كان في خلاف في وجهات النظر وانا مش راضي وهو غير حاجات في نهاية العمل وانا مش حابب اتكلم في تفاصيل لانها كواليس عمل وهو عمل جماعي وانا مكنتش راضي عن المشاهد ودة مش اللي أنا عامله والطبيعي المخرج يدخل لكن في إطار شغله كمخرج مش أنه يدخل في شغل المؤلف".

وتابع: "في خط درامي كامل تم إضافته علشان مرات المنتج تمثل وتم تكوين شخصية من الفراغ ومش معروف هي مين ولا جت ليه وعلشان مرات المنتج تمثل وهو مش امين على الورق بالشكل دة فانا مش هتعامل معاه تاني"

وأضاف: "وانا من البداية مكنتش موافق على المخرج اصلا، وهادي الباجوري مخرج اعلانات أو كليبات لكن اعماله الدرامية مش بحبها والفيلم الوحيد اللي عمله شبه النوع دة هو فيلم وردة ودة فيلم محدش عارفه اصلا ولما المنتج قالي أن دة المخرج اللي هيشتغل معانا قلتله لا"

واختتم كلامه، بقوله: "اللي هو صوره زي ما مكتوب معنديش مشكلة فيه وانا مشكلتي في اللي يتعلق بشغلي، والجزء التاني الحق الوحيد فيه ليه للمؤلف".

وعن عدم وجود أحمد فهمي في الجزئ الثاني، قال: "وأحمد فهمي مش هيكون موجود لأن قصته خلصت وانا من قبل سفاح الجيزة الرابط بالنسبالي في الأجزاء هو القصص المختلفة ومستوحى من أحداث حقيقية دة اللي بيربط الأجزاء"