زينة تكشف تفاصيل دورها في فيلم "الإسكندراني"

قالت الفنانة زينة إنها سعيدة بالتعاون للمرة الثانية مع المخرج خالد يوسف في فيلم «الإسكندرانى» بعدما قدما فيلم «كارما» في 2018، مشيرة إلى أنها وجدت أنه مخرج يحب الممثل ووجدت هذه النتيجة في العمل.

وتحدثت زينة عن كواليس فيلم «الإسكندرانى»، بقولها: «كنت قلقانة وهو كان عصبى قليلا، وبيزعق وأنا بخاف أوى من الطريقة دى، مبحبش كده، بس لما اتعودت على طريقته، عرفت أنه بجد بيحب الممثل جدا وبيخلى باله منه، ولما شوفت النتيجة وانها طلعت جيدة جدا».

وتابعت: «أخدت فرصة كبيرة إنى أشتغل مع مخرج مهم، وفى البداية لما كلمنى قبل الفيلم بحوالى شهرين، أبلغنى أن لديه معالجة لفيلم كتبه الأستاذ أسامة أنور عكاشة، وعارف إنى باحب الحاجات القيمة دى، طلبت منه يبعتهولى ولما قرأت في الحقيقة أعجبنى جدا».

وتجسد «زينة» في الفيلم شخصية «قمر»، وقالت عنها: «هى خليط من حاجات كتير، وشخصيتها حلوة ومكافحة ومهمة، وكمان شخصية عنيدة وبتمشى رأيها في الصح مش في الغلط، وأيضا محبوبة وتعرضت لظلم كتير، وعاشت مثل أي ست مصرية تتعرض لحاجات كتير وعايشة وصبورة، وغير ذلك هي بتساعد الناس وبتقف جنبهم، وبتحاول تساعد كل اللى حواليها، وهى دى البنت الإسكندرانية والمصرية عموما».

وتابعت: «جدتى اسكندرانية وعندما بدأت العمل وذكرت ذلك الجميع تفاجأ إنى عارفة اسكندرانى شوية، وقصدى في اللهجة الإسكندرانى، وأنا طفلة كنت بلقط أي حاجة، وهذا منحنى خبرة كبيرة، وكل ذلك كان لدىّ وطلع وقت التصوير من عقلى، وكل الكرو بتاع الفيلم ناس ونجوم محترمين، وأنا من جمهورهم كلهم».