صلاح الجهيني مؤلف ومنتج مسرحية "زواج اصطناعي" يرد على هجوم كاملة أبو ذكري

رد صلاح الجهيني مؤلف ومنتج مسرحية "زواج اصطناعي" على المخرجة كاملة أبو ذكري، بعد ما كتبته عن المسرحية عقب تعليق الفنان بيومي فؤاد على انسحاب محمد سلام من العمل.

صلاح الجهيني كتب، على حسابه بموقع "الفيس بوك": "من الحاجات اللي بتضايق أي فنان هي انتقاد الناس وتقييمهم للعمل من خلال الإعلان دون مشاهدة العمل نفسه.. وكان شيء مؤسف جدا لما الناس هاجمت مسلسل قبل ما تشوفه لمجرد أن حواجب البطلة على البوستر معجبتهمش ولكن المؤسف أكثر أن مخرجة ليها تقديرها واحترامها زي الأستاذة كاملة أبو ذكري قررت تهاجم عمل فني وتتهمه أنه اتكتب واتنفذ في 3 أيام بدون ما تشوف منه أي مشهد متجاهلة مجهود أكتر من 60 شخص اشتغلوا على مدار 5 شهور عشان العمل ده يظهر ويتنفذ على الوجه اللي هما شايفينه بيرضيهم".

وأضاف: "أستاذة كاملة أنا مقدر موقفك السياسي والإنساني ولكن يؤسفني أقول لحضرتك أنك جرحتي عدد كبير من الفنانين والشباب المجتهد اللي بيعتبروا حضرتك قدوة ليهم بدون وجه حق".

وكانت المخرجة كاملة أبو ذكري قد وجهت رسالة للفنان بيومي فؤاد بعد أن أثار الجدل بتصريحاته حول الفن خلال عرض مسرحيته "زواج اصطناعي"، بقولها: "الأستاذ الفنان إلي كنت واحده من محبيه... لو حضرتك فاكر إنك لما تعمل عمل إتحضر واتكتب واتنفذ في تلات أيام، وتروح تعرضه وترقص وتغني وتضحك وبعد كده تأخد ألاف الدولارات، لو ده بتسميه فن فأنا لا يشرفني إني أكون زميلة لك في هذه المهنة".

وأضافت: "ولما تكون بتعرض التفاهات دي ده لا يشرف الفن المصري ولما تعرض التفاهه دي وجارك بيدبحوا أطفاله ونساءه ورجاله وتقولي الفن يبقي ماعنديش كلام أقدر أقوله غير إن الإحساس والفن نعمه إنتم أخر ناس تتكلموا عنها".