حمو بيكا يرد على منتقدي "سبوع ابنته" الباهظ

رد مطرب المهرجانات حمو بيكا على منتقدي سبوع ابنته «تاج» الباهظ، بالإضافة لظهوره برفقة زوجته والتي ظهرت مرتدية العديد من المشغولات الذهبية.

حمو بيكا قال: "سيبوا الملك للمالك، أنا طالع من منطقة شعبية اسمها الدخيلة من أسرة من أربع اخوات والأب والأم وكنا قاعدين في أوضة وصالة والحمام جوه المطبخ".

وتابع: "أول مرة أقول الكلام ده، وأبويا كان على باب الله بيسافر ويتغرب، وشقى عشان اللقمة اللي بناكلها بالحلال، أنا مدخلتش مدرسة ومتعلمتش لكن اشتغلت وشقيت واتغربت كتير وأنا صغير، وعمري ما مديت أيدي على حاجة مش بتاعتي وكنت بقول يا رب أكرمني وأبقى حاجة لأهلي".

وأضاف: "ولما ربنا بيكرم بني آدم ويرزقه مش من فراغ، وما اتولدتش في بوقي معلقة دهب وكنت بحب الخير لكل الناس ولحد دلوقتي".

وأكمل: "اتقال إن السبوع اتصرف عليه ملايين وعربية بـ 10 مليون دولار، إزاي دي العربية كانت مخلعة والكلام ده مش حقيقي روحوا واسألوا على القاعة بنفسكم، وكل اللي حضروا معلمين ونجوم بيحبوا بيكا، والدنيا كلها بتعمل كده، وأكبر من كده بكتير ولا علشان أنا حمو بيكا".

وأضاف: "في إيه يا جماعة من وقت السبوع لحد دلوقتي كنت في مشاكل شخصية من الحسد، وده مذكور في القرآن، والحمد لله عديت وبنتي الأميرة تاج في حضني وربنا يخليها ليا ولما ربنا يديني هعملها أكتر من كده، علشان أنت بذات نفسك بتشتغل علشان عيالك وتتمنى تجيب لعيالك نجمة من السما".