نهى العمروسي تكشف عن عمرها وتؤكد: مش حاسة بأي كسوف من سني
عبرت الفنانة المصرية نهى العمروسي عن تعجبها من خجل البعض من ذكر عمرهم الحقيقي، خاصة في حالة إذا كان كبير في السن.
نهى العمروسي كتبت، على حسابها بموقع "الفيس بوك": "إللي سبقونا علمونا إنك لما تبقي شاب صغير تتباهي و تفخر بشبابك و بصغر سنك ، لكن لما تكبر و تبتدي تشيب إياك تقول سنك الحقيقي كإنه عار، الموروث دة عالمي مش بس هنا في مصر ، و دايما يقول لك إوعي تسأل ست علي سنها ، و ممكن يبقي ليك صاحب أو صاحبة قريبين منك وقايلين لك كل أسرارهم بس نيجي عند السن و نكذب عشان نصغر عمرنا !!!".
وأضافت: " بصراحة الحكاية أنا دايما بستغربها لإن كلنا بنكبر كل يوم و لما بنكبر بنفهم أكتر و بنجرب أكتر و بنحس بالتاني أكتر ، لما بنكبر بنسكت أكتر و بنسمع أكتر ، ومساحة التسامح والرحمة بتكبر جوة قلوبنا أكتر و أكتر ، لما بنكبر بنتعلم من الدنيا و بنشوف حاجات عمرنا ما تخيلناها ، و بتحصل لنا حاجات و صدمات أد ما بتجرح قلوبنا و بتعور روحنا بس بتعلمنا إننا نقبل القدر و المكتوب ، و إننا نتسامح مع كل الأوجاع لإنها علمتنا دروس قيمتها أكبر بكتير من وجعها ، لما بنكبر بيبقي عندنا بصيرة مش بس بصر ، بنتعلم الصبر و الثبات و بنعرف إن كل حاجة بتحصل في معادها ، و علي أد ما خطوط السن بتحفر وشوشنا علي أد ما حكمتنا بتزيد و طاقة حبنا الغير مشروط بتشع نور في كل مكان بنروحه و علي كل حد بنتعامل معاه".
وكشفت عن عمرها، بقولها: "عشان كدة أنا قررت إني أعلن رفضي للموروث دة علي الملأ .أنا إسمي "نهي العمروسي" في يوم ١١ يناير ٢٠٢٤ تميت ٦١ سنة و أنا مش حاسة بأي كسوف أو خزى أو عار من سني.. ياريت لو حد فيكم يحب يخالف الموروث المغلوط دة يكتب سنه في الكومنتس هبقي مبسوطة أوى و حاسة إني مش لوحدي خصوصا لو كانت ست زيي ... بحبكم 💜💜💜".