تامر حبيب يشيد بفيلم "رحلة 404" بطولة منى زكي: عوضنا عطش السنين
أشاد السيناريست تامر حبيب بفيلم "رحلة 404"، الذي انطلق عرضه في السينمات، من بطولة النجمة منى زكي.
تامر حبيب كتب، على حسابه بموقع "انستجرام": "بشري لكل من يحب السينما الحلوة، اللي بتكلم المشاعر والعقل، و اللي بتخليك تفكر، و حالتك و انت خارج من الفيلم مش زي لما دخلته، و تنام و تصحي و انت فاكر الفيلم و بتسترجع مشاهده و حاسس انك منتشي و دماغك مليانة".
وأضاف: "بشري لكل من يستمتع بالتمثيل الثقيل الراسي الذكي اللي مش من اول درج… بشري لكل من اشتاق انه يتفرج علي فيلم مننا وعننا وراه مؤلف كاتب كل حرف مع سبق الإصرار وقاصد يستفزك و مايسيباكش في حالك بنضج و موهبة و صدق".
وتابع: "بشري لأمثالي ممن اشتاقوا ان يسلموا نفسهم لمخرج محترم و موهوب و صادق و مخلص و مصدق كل حرف في اللي بيخرجه و عنده شخصية و طعم بصمة مش شبه حد… بشري لكل من اشتاق ان يستمتع بفيلم وراه فريق كامل امام و خلف الكاميرا قاصد ان يمتع جمهوره".
واختتم كلامه، بقوله: "رحلة ٤٠٤ جت تعوضنا عطش سنين …. شكراً من كل قلبي لكل اسم اتكتب علي افيش و تيتر هذا العمل…. روحوا الهي يسعدكم زي ما اسعدتوني 🙏🙏👏👏👏👏👏👏👏👏❤️❤️❤️❤️❤️❤️❤️❤️❤️❤️".