زوجة حلمي بكر ترد على اتهامات نجله لها بخطفه وتعذيبه

ردت سماح القرشي، زوجة الموسيقار حلمي بكر، على اتهامات نجله هشام لها بالاستيلاء على شقته في المهندسين، وخطفه ونقله إلى إحدى الشقق في الشرقية في الأرياف،

زوجة حلمي بكر قالت: "الموسيقار الكبير برفقة زوجته وابنته في محافظة الشرقية مش في الأرياف، لكن في مدينة كفر صقر وإخوته كانوا هنا الأسبوع اللي فات".

وتابعت: "إخواته جم علشان ياخدوه معرفش مين بعتهم، ورفض الذهاب معهم وقال لهم لن أغادر بدون "ماما" وهذه أمي أنا، وعندما تدهورت حالته الصحية في المهندسين رفض الذهاب للمستشفى لمدة أسبوعين وأكثر وقال مش هروح مستشفى".

وأضافت: "قلنا نخليه يغير جو في هواء نظيف وجينا هنا علشان أرعاه وعلشان أهلي يساعدوني، لأن الحمل كان تقيل عليا ومعندناش إمكانيات إننا نوديه مستشفى خاص، لأن أمواله سرقت من مدير أعماله، ومكنش ينفع نسيبه كدا، وابنه كان موجود في القاهرة الأسبوع الماضي ومعنا تسجيلات صوتية بذلك، ووالده طلب منه زيارته لكنه لم يأتي قائلا صعب أجي من التجمع للمهندسين".

أما عن منعها اتصاله بوالده، قالت: "هو بالفعل تحدث في التليفون يوم الجمعة وقلت له كمان شوية كلمني علشان أخلي بباك يكلمك، وماتكلمش تاني وقال لي لو سمحتي ودي بابا بيته في المهندسين"، ووجهت رسالة لابنه قائلة: "باباك بخير وأمان واحترم أنك أخو ريهام".

وعن عدم ردها على الاتصالات قالت: "بنرد على الأرقام المعروفة المسجلة على تليفونه لكن بقية الأرقام غير المعروفة مش بعرف أرد عليها، في صحفيين كتير بيتصلوا وأنا عندي بنتي في مدرسة وعندي حالته مشغولة معاه وأهلي بيساعدوني، ومافيش إمكانيات ندخله مستشفى كبيرة وما ينفعش يدخل أي مستشفى".

وعن إمكانية زيارة وفد من النقابة له، قالت: "مسموح لأي حد يزور الأستاذ، ومش بنمنع حد وإخواته جم لأخوهم وطلبوا ياخدوه معاهم ورفض، في حين إنه كان تعبان من ثلاثة أشهر ومحدش جاء زاره، وهو نفسيا تعبان وبيقول الناس كانت محتاجني لما كنت على الشاشة ولما تعبت محدش فاكرني".

وعن حقيقة تعرضه لمعاملة سيئة وللتعذيب قالت: "ماحصلش والأستاذ حلمي لسه قايللي في تعقيبه على التعذيب قائلا هو انا عيل صغير؟ وفي ناس بتقول إنه مخطوف".

وأوضحت تفاصيل حالته الصحية، بقولها: "عنده كهربا زيادة في القلب ومنع نفسه من الاتصالات، ثم مشاكل كلوية ومياه على الرئة حاولنا نعالجها علشان منلجأش للغسيل، والحمد لله لم نصل لتلك المرحلة، وعدينا خط الموت في فترة قصيرة جدا".