محمد عبدالوهاب يغازل مذيعة وزنها 120 كيلو.. «أكل عيش»
تميز موسيقار الأجيال الراحل محمد عبدالوهاب، بخفة ظل وحضور عال ومميز، اشتهر بحرصه الشديد على فنه واستخدام شتى الوسائل للحفاظ على نجاحه وريادته، حتى ولو بـ«النفاق».
صورة صوتية من منزل عبدالوهاب، كما يرويها أحد أصدقائه، توضح ذلك، ففي حوار تليفوني بينه وبين إحدى المذيعات، جرى الحوار الآتي:
عبد الوهاب: إنتي فين يا حياتي؟ لا لا أنا زعلان منك قوي، بقى فات العيد، وفات شم النسيم ولا أسمع صوتك؟!
المذيعة: ............
عبدالوهاب: بتقولي أغنية «مين غير ليه» عجبتك؟! يا ستي ألف شكر، بس يا ريت «الكلام الحلو ده اسمعه بصوتك في الراديو مش في التليفون بس!» أنا بعت لك شريط خاص عشان تسمعي الأغنية لوحدك قبل النوم، يا ترى وصلك الشريط؟
المذيعة: ...........
عبدالوهاب: يا بخت الشريط، يا بخت عبد الوهاب لما صوته حيوصل لأحلى الستات وأحلى المذيعات وأحلى الصديقات وأحلى المستمعات!
المذيعة: ........
عبدالوهاب: إنت وحشتيني خالص أنا عايز أسمع صوتك في «من غير ليه» في أقرب فرصة. وعايز أشوفك عندنا في البيت واهي «نهلة» حبيبة قلبك سامعه كلامي، وعايزة تشوفك النهار ده قبل بكرة وما تخليش الواد عبد الحليم يسرقك منا، ولا حتى الواد الأطرش.
المذيعة: ..........
وعاد يغازل المذيعة ويقول:
ـ يا ترى زوجك عارف قيمة النعمة الأبدية اللي حواليه، واللي اسمها .......؟!
ورنت ضحكة المذيعة وقالت بدلال، وهي تودع عبد الوهاب بالعبارة التي اشتهر بها في أحد أفلامه: كفاية كده النهار ده يا أستاذ.. بونجور بقى!
فأجابها عبد الوهاب: ألف سلامة يا حياتي، ألف بنجور يا عذابي!
ثم التفت لصديقه قائلاً: الست دي وجهها حلو ولكنها تزن مائة وعشرين كيلو جراماً، فقال له: ولكنك أسرفت في المجاملة والغزل يا أستاذ!
فرد: ده كله نسميه عندنا أكل عيش.
فداعبه صديقه قائلاً: يا سيدي بلاش هذا النفاق واشتري بسكوت أحسن! فضحك موسيقار الأجيال وراح يدندن لحنه الجديد. (والعهدة على الراوي)