سلمى صباحي: زوجة علي الحجار خلتني أغني معاه على المسرح

روت الإعلامية المصرية سلمى صباحي موقف حدث لها يوم الخميس الماضي، أثناء حضورها حفل الفنان علي الحجار في ساقية الصاوي.

سلمى كتبت -على حسابها الخاص على موقع «الفيس بوك»-: «في حفلة علي الحجار في الساقية كالعادة من أول ما بدأ الحفلة وأنا بغني معاه كل حاجه، ويشاء القدر إن اللي قاعدة جمبي تطلع مراته، بعد كام غنوه سلمت عليا وعرفتني بنفسها اتبسطت جدا إني اتعرفت عليها ست لطيفه جدا، في الاستراحة هي دخلتله، وفي الجزء التاني من الحفلة بعد 3 أغاني لقيت علي الحجار بيقول عرفت إن سلمى صباحي هنا!!!».

وأضافت: «قلبي بدأ يدق جامد جدا والناس بدأت تبصلي، كمل كلامه وقال أنا حابب اسمع صوتها هي موجودة! فشاورتله، قمت وطلعت على المسرح سلمت عليه وشكرته كتير وقاللي نغني زي الهوا قلتله ياللا بينا ولسه قلبي كان بيدق جامد من الفرحة وخفت معرفش اغني من كتر ماقلبي بيدق! بس أول ما غنى وأنا عدت الجملة وراه (زي الهوا الساير وخيال الطيف) الناس صقفت جامد جدا»، مشيرة إلى أن تصفيق الناس لها طمأنها وأسعدها، وطلب منها الحجار أن تغني معه أغنية ثانية وهي «بنت وولد»، فقامت بغنائها بشكل جميل.

واختتمت كلامها بقولها: «بالنسبة لعلي الحجار مفيش كلام اقدر أقوله عنه غير انه إنسان بجد قبل ما يكون فنان بجد، بالنسبة للجمهور إيه الحلاوة دي وإيه الكرم ده حاجه تفرح بجد، بالنسبة لمرات علي الحجار هي اللي قالتله في الاستراحة إني موجودة وبغني معاه كل أغانيه.. بالنسبة للحفلة منتهى الطاقة الايجابية اللي بتحس بيها من المعاني الجميلة والصوت العظيم والمزيكا الحلوة.. الحالة كلها ملهمه.. بالنسبة بقى للسيناريو الرباني الجميل أوي ده.. شكرا يا ربي أنت الأعلم إيه اللي ممكن يفرح عبادك.. علي الحجار.. أستاذي.. شرف إني اغني معاك ع المسرح».

يذكر أن الإعلامية المصرية سلمى صباحي تمتلك موهبة الغناء إلى جانب عملها الإعلامي، حيث قدمت عدد من الأغاني منها أغنية «الله حي»، أغنية «بشكرك»، أغنية «ماشيين بالعكس»، وغيرها.