يعنى إيه ست وبتسوق.. هاشتاج ساخر من قيادة المرأة

"يعنى إيه ست وبتسوق؟.. يعنى توقع الركنة فى أى مكان بأى شكل، يعنى تعمل حسابك إنك بتسوق عربيتك وبتسوق لها، يعنى دباديب كتيرة زى أى محل لعب، يعنى انتبه من فضلك السيارة التى أمامك ممكن تعمل حركات غير متوقعة".

موجة من الانتقادات انتشرت على "هاشتاج" يستهدف السخرية من "سواقة البنات"، تحول فيما بعد إلى ساحة معركة بين بنات حواء ومنتقديها، دافعن خلاله عن أنفسهن بتوضيح المشكلات التى تواجههن أثناء القيادة، لمجرد أنهن سيدات "يعنى إيه ست وبتسوق؟، يعنى فرصة نكسر عليها ومافيش مانع بدل ما نعتذرلها نزعق فيها، ومهما شغلت الإشارات الضوئية ماحدش يعديها إلا لما تشاور بإيدها، ولو هدت علشان تعدى حد كبير فى السن اللى وراها يشتمها رغم إنها مدية إشارة انتظار"، بينما تساءلت الكثيرات "لما كل البلاوى من سواقة الستات اسألوا نفسكوا مين اللى بيسوق التكاتك والميكروباصات والتريلات؟".

فى المقابل يقول المهندس "محمد حازم" المدير الإدارى لصفحة قائد المستقبل لتعليم قواعد المرور, "على عكس المعروف أن المرأة غير محترفة قيادة وتتسبب فى الكثير من الحوادث على الطريق، الإحصائيات الصادرة من "الإدارة العامة للمرور" تؤكد أن المرأة أكثر التزما بقواعد المرور، والسرعة على الطريق، بالإضافة إلى التقيد بأماكن الوقوف، وأيضا تحافظ على ارتداء حزام الأمان عن الرجل، لكن الدراسات أثبتت أنهن أقل معرفة بأعطال السيارة، وطرق الصيانة الصحيحة، كما أنها لا تفضل المجازفة بالقيادة على الطرق الجديدة".